हेटाैँडामा भाउजूको हत्या गर्ने देवरलाई ३५ वर्ष कैद

निरन्तर न्यूज
१३ असार २०८२, शुक्रबार ०९:३७

हेटौंडा । मकवानपुरमा आफ्नै भाउजूको हत्या गरेको र सहोदर दाजुको हत्या गर्ने उद्योगमा एक युवकलाई ३५ वर्ष कैद फैसला सुनाइएकाे छ ।

जिल्ला अदालत मकवानपुरकी न्यायाधीश अवनी मैनाली भट्टराईको बिहीबार बसेको इजलासले  उक्ल फैसला सुनाएको हाे । यससँगै अदालतले पीडकबाट मृतक भाउजूको हकदारलाई १० लाख रुपैयाँ क्षतिपूर्ति रकम भराउने आदेश दिएको छ ।

न्यायाधीश भट्टराईको इजलासले हेटौंडा उपमहानगरपालिका–१ चौकिटोल बस्ने वर्ष २२ का राहुल दासले एकैघर बस्ने हेटौंडा ३५ वर्षीया भाउजू गुडिया दासको हत्या गरेको र माहिला दाजु २८ वर्षीय रुपेश दासको हत्या गर्ने उद्योग गरेको ठहर गरेकाे छ।

राहुललाई भाउजूको हत्या गरेको अभियोगमा २५ वर्ष कैद र दाजुको हत्या प्रयास गरेकोमा थप १० वर्ष कैद गरी कुल ३५ वर्ष कैद हुने फैसला सुनाइएको जिल्ला अदालत मकवानपुरका सूचना अधिकारी केशवराज कौशिकले बताए । अदालतले पीडकबाट मृतकको नजिकको हकदारलाई क्षतिपूर्त स्वरूप १० लाख रुपैयाँ भराउने आदेश दिएको छ ।यससँगै  एक लाख रुपैयाँ जरिवाना पनि तोकिएको छ । घाइते दाजुको उचित उपचार खर्च उपलब्ध गराउन पनि अदालतले आदेश दिएको छ । अदालतबाट ३५ वर्ष कैद तोकिएका राहुल भीमफेदी कारागारमा छन् ।

राहुलले गत चैत १२ गते कोठामा सुतेकी भाउजूलाई खुकुरी प्रहार गरेर हत्या गरेका थिए । भाउजूको हत्यापछि माहिला दाजु रुपेशको पनि हत्या गर्ने उद्देश्यले राहुलले घाँटी र शरीरका विभिन्न भागमा खुकुरी प्रहार गरेर गम्भीर घाइते बनाएका थिए ।

लागुऔषध सेवनकर्ता देवर राहुल दासलाई भाउजू गुडियाले लागुऔषध नखान सम्झाइबुझाइ गर्दै आएकी थिइन् । त्यही झोकमा राहुलले उनको हत्या गरेका थिए । माहिला दाजु रुपेशले पनि उनलाई लागुऔषध सेवन नगर्न दबाब दिँदै आएका थिए । तीन दाजुभाइमध्ये जेठा रोशन दास (मृतकका पति) रोजगारीको सिलसिलामा पाँच महिनाअघि कतार गएका थिए । तीन सन्तानकी आमा गुडियालाई राहुलले खुकुरी प्रहार गरी कोठामै हत्या गरेर सिरकले छोपेर राखि दाजु रुपेशमाथि खुकुरी प्रहार गरेका थिए ।

प्रतिक्रिया दिनुहोस

  • प्रतिक्रियाहरु