जनकपुरमा विमलेशको हत्या आरोपमा जुली झा पक्राउ
जनकपुर । जनकपुरधामस्थित एक होटेलमा छुरा प्रहार गरी हत्या गरेको आरोपमा एक युवतीलाई प्रहरीले पक्राउ गरेको छ ।
प्रहरीका अनुसार महोत्तरी गाउँपालिका–१, पर्सा टोल निवासी ३२ वर्षीय विमलेश यादवको हत्या अभियोगमा २१ वर्षीया जुली झालाई पक्राउ गरिएको हो । झा महोत्तरीको बनौटा घर भई हाल जनकपुरधाम उपमहानगरपालिका–४ मा डेरा गरी बस्दै आएकी थिइन् ।
साउन ३ गते राति १०ः०२ बजे विमलेश यादव जनकपुरधाम उपमहानगरपालिका–२३ स्थित होटेल एसपी एण्ड गेस्ट हाउस को कोठा नं. १०२ मा प्रवेश गरेका थिए । सीसीटीभी फुटेज र मोबाइल रेकर्डको आधारमा उनी बा ४५ प ४९८६ नम्बरको मोटरसाइकलमा सवार भई अभियुक्तसँगै होटलमा प्रवेश गरेका थिए । होटलमा उनले “शनि यादव“ नाम लेखाई कोठा बुक गरेका थिए ।
प्रहरीको प्रारम्भिक अनुसन्धान अनुसार, सोही रात २ः५७ बजे यादव होटलको पहिलो तल्लाबाट रगताम्य अवस्थामा भुइँमा खसेको देखिन्छ । लगत्तै अभियुक्त जुली झा कुर्ता सुरुवालमा खाली खुट्टा भुइँतर्फ तल झरेर भाग्दै गरेको दृश्य सीसीटीभीमा कैद भएको छ ।
घटनापछि तत्कालै खटिएको जिरोमाइल प्रहरी टोलीले घाइते अवस्थाको यादवलाई प्रादेशिक अस्पताल जनकपुरधाम पु¥याएको थियो, जहाँ उपचारका क्रममा बिहान ७ः४५ बजे उनको मृत्यु भएको जनाइएको छ ।
प्रहरी अनुसन्धानका क्रममा अभियुक्त जुली झालाई सोही दिन दिउँसो १२ः०० बजे महोत्तरीको परौलतर्फ भाग्दै गरेको अवस्थामा नियन्त्रणमा लिइएको जनाइएको छ । घटनाको थप अनुसन्धान जारी रहेको प्रहरीले जनाएको छ ।
