समाजवादी पार्टी प्रदेश ५ ले विभिन्न स्थानमा किटनाशक औषधि छर्किएको
काठमाडौं, १८ चैत । विश्वव्यापी महामारीको रुप लिइरहेको कोरोना भाइरस (कोभिड-१९)को विरुद्ध समाजवादी पार्टी प्रदेश ५ ले विभिन्न स्थानमा किटनाशक औषधि छर्किएको उक्त पार्टीले जनाएको छ ।
प्रदेश नं. ५ का मुख्यसचिव यज्ञ पोखरेलका अनुसार पार्टीका केन्द्रीय सचिव तथा पूर्वमन्त्री इस्तियाक राईको लगानी र नेतृत्वमा नेपालगञ्ज बजारभरी यसै साता किटनाशक औषधि छर्किने काम सम्पन्न भएको छ ।
यस्तै, पार्टीका केन्द्रीय सदस्य तथा प्रदेश ईञ्चार्ज दान बहादुर चौधरी र प्रदेश संसदीय दलका नेता सहसराम यादवको नेतृतव्वमा कपिलवस्तुमा माइकिङ गरी लकडाउनको पालना गर्दै कोरोनाबाट सावधानी अपनाउन सचेतना फैलाइएको पोखरेलले जानकारी दिए ।
उता, समाजवादी पार्टी दाङका सहईञ्चार्ज टोपबहादुर महराको नेतृत्वमा तुल्सीपुरको चन्द्रौटामा खाद्यान्न वितरण गरिएको छ भने सिना नगरअध्यक्ष अर्जुन जैसवालले औषधिका लागि ५० हजार र खाद्यान्नका लागि ५० हजार गरी एक लाख राहतको घोषणा गरेका छन् ।
कोरोना महामारीविरुद्ध जनचेतना जगाउनेदेखि राहत वितरणसम्मको काम अगाडि बढिरहेको प्रदेशका मुख्यसचिव पोखरेलले जानकारी दिए ।
