नेपालबाट भिडाको अन्तर्राष्ट्रिय यात्रा सुरु
काठमाडौं। हिरो मोटोकर्प अन्तर्गतको विद्युतीय दुईपांग्रे ब्रान्ड विदा (VIDA) ले आफ्नो पहिलो अन्तर्राष्ट्रिय बजारका रूपमा नेपालमा औपचारिक प्रवेश गरेको छ। यससँगै कम्पनीले आफ्नो विश्वव्यापी विस्तारको सुरुआत नेपालबाट गरेको जनाएको छ।
नेपालमा विदाका उत्पादनहरू सीजी मोटर्स (चौधरी ग्रुप) मार्फत आधिकारिक रूपमा बिक्री–वितरण हुनेछन्। कम्पनीले दैनिक प्रयोगका लागि विदा भीएक्स–२ (VIDA VX2) विद्युतीय स्कुटर र किशोर तथा युवापुस्तालाई लक्षित विदा डर्ट–ई के–३ (VIDA DIRT.E K3) विद्युतीय अफ–रोड बाइक सार्वजनिक गरेको हो।
भीएक्स–२ स्कुटर प्लस र गो गरी दुई संस्करणमा उपलब्ध हुनेछ। भीएक्स–२ प्लस मा ४.४ किलोवाट–घण्टा क्षमता (दुईवटा २.२ किलोवाट–घण्टा निकाल्न मिल्ने) ब्याट्री रहेको छ। यसले वास्तविक अवस्थामा करिब १४० किलोमिटर दूरी तय गर्न सक्ने, अधिकतम ९० किलोमिटर प्रतिघण्टा गति हासिल गर्ने तथा शून्यदेखि ४० किलोमिटर प्रतिघण्टा गति ३.१ सेकेन्डमा लिन सक्ने कम्पनीले जनाएको छ। भीएक्स–२ गो मा २.२ किलोवाट–घण्टा निकाल्न मिल्ने ब्याट्री रहेको छ, जसले करिब ७५ किलोमिटर दूरी तय गर्न सक्ने, अधिकतम ७० किलोमिटर प्रतिघण्टा गति हासिल गर्ने तथा शून्यदेखि ४० किलोमिटर प्रतिघण्टा गति ४.२ सेकेन्डमा लिन सक्ने दाबी गरिएको छ।
दुवै स्कुटरमा ६५ मिनेटमै २० देखि ८० प्रतिशतसम्म द्रुत चार्ज गर्न सकिने सुविधा छ। निकाल्न मिल्ने ब्याट्रीलाई घरकै सामान्य ५ एम्पियरको प्लगबाट पनि चार्ज गर्न सकिन्छ। साथै मोबाइल एप, मार्गनिर्देशन, भौगोलिक सुरक्षा सीमा (जियो–फेन्सिङ), कल तथा सन्देश सूचना र इन्टरनेटमार्फत सफ्टवेयर अद्यावधिक (ओटीए) जस्ता स्मार्ट सुविधा उपलब्ध छन्। कम्पनीका अनुसार भीएक्स–२ ले विश्वप्रसिद्ध अनुसन्धान संस्था जेडी पावर को दुईपांग्रे प्रारम्भिक गुणस्तर अध्ययनमा उत्कृष्ट स्थान हासिल गरेको छ।
त्यस्तै विदा डर्ट–ई के–३ विशेषगरी किशोर तथा युवा राइडरलाई लक्षित गरी विकास गरिएको पूर्ण विद्युतीय अफ–रोड बाइक हो। यसमा प्रयोगकर्ताको उमेर र शारीरिक बनावटअनुसार तीन फरक आकारमा परिवर्तन गर्न मिल्ने प्रणाली राखिएको छ। मोबाइल एपमार्फत अभिभावकले बाइकको गति नियन्त्रण गर्न, अधिकतम गति निर्धारण गर्न तथा तीन फरक गति मोड (८–९, १७–१८ र २३–२४ किलोमिटर प्रतिघण्टा) चयन गर्न सक्ने सुविधा रहेको छ।
३५० वाट मोटर र ३६० वाट–घण्टा निकाल्न मिल्ने ब्याट्री रहेको यस बाइकले सडक अवस्था र प्रयोगअनुसार करिब तीन घण्टासम्म सञ्चालन समय दिने कम्पनीले जनाएको छ। ब्याट्री २० देखि ८० प्रतिशतसम्म चार्ज हुन करिब दुई घण्टा लाग्छ। उत्कृष्ट डिजाइन र नवीन प्रविधिका लागि यसले रेड डट डिजाइन अवार्ड–२०२५ र सीईएस इनोभेसन अवार्ड–२०२६ प्राप्त गरिसकेको छ।
हिरो मोटोकर्पको उदीयमान विद्युतीय व्यवसाय एकाइकी प्रमुख व्यवसाय अधिकृत कौशल्या नन्दकुमार ले नेपाल विद्युतीय सवारीसाधनको तीव्र विस्तार भइरहेको रणनीतिक बजार भएकाले विदाको अन्तर्राष्ट्रिय यात्रा यहींबाट सुरु गरिएको बताइन्। उनले भारतमा विकसित आधुनिक प्रविधि र इन्जिनियरिङ नेपाली ग्राहकसम्म पुर्याउन पाउँदा उत्साहित रहेको तथा सीजी मोटर्ससँगको सहकार्यमार्फत भरपर्दो र प्रिमियम विद्युतीय दुईपांग्रे उपलब्ध गराउने प्रतिबद्धता व्यक्त गरिन्।
चौधरी ग्रुपका प्रबन्ध निर्देशक निर्वाण चौधरी ले नेपाल दिगो तथा हरित यातायाततर्फ तीव्र रूपमा अघि बढिरहेको उल्लेख गर्दै विदाको आगमनले विद्युतीय दुईपांग्रे बजारमा नयाँ मापदण्ड स्थापित गर्ने विश्वास व्यक्त गरे। उनले हिरो मोटोकर्पसँगको लामो सहकार्यलाई विदामार्फत अझ सुदृढ बनाउँदै नेपालको हरित भविष्य निर्माणमा योगदान पुर्याउने बताए।
सन् २०१४ देखि नेपाली बजारमा उपस्थित हिरो मोटोकर्पले विदाको आगमनसँगै स्मार्ट, दिगो र भविष्यमुखी विद्युतीय गतिशीलताको नयाँ अध्याय सुरु गरेको जनाएको छ। भारतको नयाँ दिल्लीस्थित मुख्यालय रहेको कम्पनी लगातार २५ वर्षदेखि विश्वकै सबैभन्दा ठूलो मोटरसाइकल तथा स्कुटर निर्माता हो। कम्पनीका उत्पादन ५३ देशमा उपलब्ध छन् भने विश्वभर १३ करोडभन्दा बढी ग्राहक रहेका छन्। साथै हार्ले–डेभिडसन, जिरो मोटरसाइकल्स, एथर इनर्जी र युलर मोटर्ससँगको साझेदारी तथा लगानीमार्फत कम्पनीले विद्युतीय सवारी क्षेत्रमा आफ्नो उपस्थिति विस्तार गर्दै आएको जनाएको छ।
कम्पनीले सार्वजनिक गरेको रेन्ज, गति र चार्जिङ समय आन्तरिक परीक्षणका आधारमा रहेको तथा वास्तविक प्रयोगमा सडक अवस्था, मौसम र सञ्चालन शैलीअनुसार फरक पर्न सक्ने जनाएको छ।
कम्पनीका कार्यकारी अध्यक्ष डा. पवन मुन्जाललाई सन् २०२५ मा Time 100 Climate List मा व्यवसायमार्फत जलवायु परिवर्तनसम्बन्धी सकारात्मक नेतृत्व प्रदान गर्ने विश्वका प्रभावशाली १०० नेतामध्ये एकका रूपमा सम्मानित गरिएको थियो।
