बागमतीमा भौतिक मन्त्रालय लिएर हानेपाको साथ बानियाँलाई
भौतिक पूर्वाधार विकास मन्त्री रायमाझीको राजिनामा, हानेपाका बज्राचार्यलाई जिम्मेवारी
हेटौंडा। बागमती प्रदेश सरकारका भौतिक पूर्वाधार विकास मन्त्रीको जिम्मा लिएर हाम्रो नेपाली पार्टीले सरकारलाई साथ दिएको छ । एमालेले सरकारलाई दिएको समर्थन फिर्ता लिएपछि अल्पमतमा परेका मुख्यमन्त्री ईन्द्रबहादुर बाँनियाले हानेपाका शैलेन्द्र मान बज्राचार्यलाई मन्त्री नियुक्त गरेसँगै सरकारको रफ्तार नरोकिएको संकेत गरेका छन् ।
यश अघि जिम्मेवारी लिएकी बिनु रायमाझी पौडेलले मंगलबार मन्त्री पदबाट राजिनामा दिनुभएको छ ।
मन्त्री पौडेलले नेपालको संविधानको धारा १६९ को उपधारा २ को खण्ड (क) बमोजिम राजिनामा दिनुभएको हो । मुख्यमन्त्री बानियाँले मंगलबार नै नेपालको संविधानको १६८ को उपधारा ९ बमोजिम मन्त्रिपरिषद्को पुर्नगठन तथा कार्यविभाजन गर्दै हाम्रो नेपाली पार्टीका प्रदेशसभा सदस्य बज्राचार्यलाई भौतिक पूर्वाधार विकास मन्त्रालयका मन्त्री नियुक्त गर्दै प्रदेश प्रमुखसमक्ष सिफारिस गर्नुभएको हो ।
सिफारिसअनुसार मुख्यमन्त्री इन्द्रबहादुर बानियाँले मुख्यमन्त्री तथा मन्त्रिपरिषद्को कार्यालयको जिम्मेवारी सम्हाल्ने भएका छन्।
त्यसैगरी, शिवराज अधिकारीलाई आन्तरिक मामिला, कानुन तथा सहकारी मन्त्रालय, उर्मिला नेपाल कृषि, पशुपन्छी, वन तथा वातावरण मन्त्रालय, कञ्चनचन्द्र बादेलाई स्वास्थ्य तथा सामाजिक विकास मन्त्रालयको जिम्मेवारी दिइएको छ।
त्यसैगरी प्रभात तामाङलाई आर्थिक मामिला तथा योजना मन्त्रालय, सुरेश श्रेष्ठ उद्योग, पर्यटन, श्रम तथा यातायात मन्त्रालय, कृष्णकुमार तामाङलाई खानेपानी, ऊर्जा तथा सिँचाइ मन्त्रालय र शैलेन्द्रमान बज्राचार्यलाई भौतिक पूर्वाधार विकास मन्त्रालयको जिम्मेवारी प्रदान गरिएको छ।
मुख्यमन्त्री बानियाँले मन्त्रिपरिषद्को कार्यसम्पादनलाई थप प्रभावकारी, समन्वयात्मक र परिणाममुखी बनाउन मन्त्रालयहरूको पुर्नगठन तथा कार्यविभाजन गरिएको जनाएका छन् ।
आज जिम्मेवारी पाएका बज्राचार्यले प्रदेश प्रमुख समक्ष पद तथा गोपनियताको सपथ खाइसकेका छन् ।
