किसानका छोरा सुगा जापानको नयाँ प्रधानमन्त्री बन्दै

निरन्तर न्यूज
२९ भाद्र २०७७, सोमबार १३:२१

काठमाडौँ । सन् १९४८ मा स्ट्रबेरी किसानहरूको परिवारमा जन्मिएका योशिहिदे सुगा जापानी राजनीतिमा हालीमुहाली गर्ने सम्भ्रान्तहरूभन्दा फरक किसिमका राजनीतिकर्मी हुन् ।

टोक्योको होसेइ विश्वविद्यालयबाट स्नातकोत्तर सकेलगत्तै उनले संसदीय निर्वाचन अभियानमा काम थालेर राजनीतिक यात्रा शुरू गरेका थिए ।

पछि उनी लिबरल डेमोक्रेटिक पार्टीका एक सांसदको सचिव बने अनि आफ्नै राजनीतिक करीयर शुरू गरे ।

सन् १९८७ मा उनी योकोहामा नगर परिषदमा निर्वाचित भए र सन् १९९६ मा पहिलोपटक जापानी संसद् डायटमा निर्वाचित भए ।

सन् २००५ मा तत्कालीन प्रधानमन्त्री जुनिचिरो कोइजुमीले उनलाई गृह तथा सञ्चार मन्त्रालयको वरिष्ठ उपमन्त्री बनाए ।

त्यसको एक वर्षपछि कोइजुमीका उत्तराधिकारी शिन्जो आबेले उनलाई तीनवटा मन्त्रालय सम्हाल्ने गरी मन्त्रीमा बढुवा गरे ।

आबे पछि सन् २०१२ मा पुनः प्रधानमन्त्री आबे बन्दा सुगालाई चीफ क्याबिनेट सेक्रेटरी जस्तो प्रभावशाली पदमा नियुक्त गरे ।

विगत आठ वर्षदेखि आबेको दाहिने हातका रूपमा रहेका सुगाले दैनिक मिडिया ब्रीफिङ गर्ने गरेका छन् र जापानको जटिल कर्मचारीतन्त्रलाई व्यवस्थापन गर्ने छवि बनाएका छन् ।

सरकारको सार्वजनिक मुहारका रूपमा उनले सन् २०१९ मा नयाँ राजाको नाम घोषणा गरे । सम्राट अकिहितोले गद्दी त्यागेपछि उनका छोरा नारुहितोको शासन शुरू भयो जसलाई रेइवा भनी सुगाले नाम दिए । त्यसपछि

उनलाई रेइवा काका भनी सम्बोधन गर्न थालियो ।

शिन्जो आबेले अगस्ट २८ मा स्वास्थ्यको कारण दर्शाउँदै पदत्यागको घोषणा गरेपछि सुगा नै उनको उत्तराधिकारी बन्ने अनुमान गरिएको थियो ।

सेप्टेम्बर २ मा उनले पार्टी प्रमुखका लागि औपचारिक उम्मेदवारीको घोषणा गरेपछि पार्टीका बहुमत गुटहरूले उनलाई समर्थन गरेका थिए ।

पार्टीको कुनै पनि गुटमा नरही अनि राजनीतिक विरासत पनि नभई पार्टी प्रमुख बनी सुगाले सोमवार इतिहास बनाएका छन् । अब उनलाई प्रधानमन्त्रीका रूपमा औपचारिक निर्वाचित हुन बाटो खुलेको छ ।

आबेको कार्यकाल बीचैमा टुंगिएपछि सुगाले निरन्तरता र स्थिरताको प्रतिनिधित्व गरेका छन् ।

एलडीपी दलको नेतृत्वमा लड्ने घोषणा गरेपछि सुगाले आबेको आर्थिक नीति आबेनोमिक्सलाई निरन्तरता दिने बताएका छन् । मौद्रिक सहजता, आर्थिक पुनरुत्थान प्याकेज र संरचनागत सुधार लगायतका कुरा त्यसमा पर्छन् ।

उनले दोस्रो विश्वयुद्धपछि बनाइएको जापानको शान्तिवादी संविधानलाई संशोधन गर्ने लक्ष्य लिएका छन् जुन आबेको प्रमुख एजेन्डा रहिआएको छ ।

तर तत्कालका लागि कोभिड–१९ महामारी नियन्त्रण तथा त्यसले ल्याएको आर्थिक सुस्ततालाई सम्बोधन गर्नु नै उनको प्राथमिकता हो ।श्रोत लोकान्त

यसमा तपाइको मत

Your email address will not be published. Required fields are marked *


*